I Avventur de Alìs ind el Paes di Meravili

 

Traduzione a cura di Gianpietro Gallinelli

 

PRESENTAZIONE DEL TRADUTTORE

Questa edizion la porta a l’attenzion di lettor del dì d’incoeu la prima traduzion del liber I Avventur de Alìs ind el Paes di Meravili in Lombard Occidental. In questa traduzion hoo deciduu de restà el pussee possibil visin a la version originala in Ingles. S’hinn mantegnuu i nòmm ingles sia di personagg del liber che di quei stòrich che apparissen ind el raccont. Compagn de tanti alter traduzion de l’Alìs, vun di impediment pussee gròss incontraa ind el voltà in Lombard Occidental la stòria, l’è staa el cercà, indoe l’era possibil, de mantegnì i bellissim gioeugh de paròll cont i quai el Lewis Carroll l’ha impienuu el liber. In tanti part stì gioeugh hinn staa adattaa per fai sonà mej ai oregg di lettor lombard.

 

In quella direzion là,” l’ha dii el Gatt, con la sciampa che faseva segn a dritta, “el gh’ha la cà el Cappellee: e in quell altra direzion,”

e el faseva segn a manzina, “la sta de cà ona Legora Marziroeula.

La poeu visità chi la voeur: hinn tucc duu matt.”

“Ma mì voeuri minga andà in mezz ai matt,” l’ha dii l’Alìs.

“Ah per quell la poeudi minga iuttà,” l’ha responduu el Gatt,

“semm tucc matt chicchinscì. Mì son matt. Lee l’è matta.”

“Com’el fa a savè che son matta?” l’ha domandaa l’Alìs.

“La gh’ha de vessel,” l’ha dii el Gatt, “o la saria minga vegnuda chì.”