DELIO TESSA: L'E' EL DI' DI MORT, ALEGHER!

Delio Tessa, L'è el dì di mort, alegher! De là del mur e altre liriche,  a cura di Dante Isella, Einaudi, Milano, 1985

Delio Tessa (1886-1939) è considerato dalla nostra critica il più importante poeta del nostro Novecento. L'edizione delle sue poesie che oggi presentiamo è probabilmente la migliore. Curata da Dante Isella, risale al 1985.

 

 

La pobbia de cà Colonetta

 

L'è creppada la pobbia de cà                                                  

Colonnetta: tè chì: la tormenta

in sto Luj se Dio voeur l'à incriccada

e crich crach, pataslonfeta-là

 

me l'à trada chì longa e tirenta,

dopo ben dusent ann che la gh'era!

l'è finida! eppur... bell'e inciodada

lì, la cascia ancamò, la voeur nò

morì, adess che gh'è chì Primavera...

 

andemm... nà... la fa sens... guardegh nò!

 

 

I cà

 

...in qui casoni                                                                  NOTTURNO

brutt ch'hin vegnuu

su come i fong

in via Bligny,

oh... se ghe n'era

scur de finester

in st'ann ch'è chì!

(par che trovassen

no de fittà...)

Adess però

gh'è el ciar in tanti;

quanti famili

che gh'è andaa a stà!

 

Chì gh'è ona strada

mezza taiada

foeura in d'on praa,

là gh'è ona fabbrica

nè su nè giò...

 

Cittaa... cittaa...

 

"...Demm de mangià.a.a!..."

...vòsen...chi l'è?

 

 

"...Demm de mangià.a.a!..."

...vòsen...là giò...

 

Fra on tram e on car

semper quell sgar!...

L'è on operari,

mi disi, "...Demm

de lavorà.a.a!..."

...on operari

chì della fabbrica,

de quij, magari,

ch'àn lassaa a cà...

 

...on desperaa!...

 

Sass... contra i mur

scur de qui cà,

sass hin qui so:

"demm de mangià.a.a!..."

Sass qui so: "...demm

de lavorà.a.a!"

Sass qui: "se no

coppèmm... porconi!"

Sass contra i mur

de qui casoni

gnucch che gh'è là!...

 

Vedritt... tendinn

mauves ai finester...

a quella lus

d'ora - soo no

perchè -

te disariet

che l'è ona sala...

Pàrlen:... buffet...

contrabuffet...

Sala-manger

della famiglia

polida...

... miee... fioeu

e musagete

secondo.

 

"Radio Marelli

Milano..."

 

            ... tavola

che desprepàren...

 

"...Radio Marellì

Milan...

 

             ...conçert..."

. . . . . . . . . . . . . . . .